Þriðjudagskvöldið 4. mars komu um 40 félagar saman og hlustuðu á magnaða frásögn Sigurðar Ólafs Sigurðssonar, ljósmyndara, af því hvernig hann hefur myndað þá sögulegu viðburði sem átt hafa sér stað á Reykjanesi undanfarin ár.
Sigurður hefur í starfi sínu sem ljósmyndari fyrir Landsbjörgu, Almannavarnir, lögreglu og aðra viðbragðsaðila verið í miklu návígi við þessa atburði alla og myndað tengsl við fólkið sem stendur í hringiðunni, bæði björgunaraðila og íbúa á svæðinu.
Það var auðheyrt á allri frásögn Sigurðar að hann hefur nálgast viðfangsefnið af virðingu, hvort sem það er fyrir fólkinu sem hefur misst dýrmætar eigur sínar, eða fyrir þeim náttúruöflum sem hafa verið að verki í þessum jarðhræringum.
Það er víst stundum sagt að mynd geti sagt meira en þúsund orð og það má með sannig segja að þá hafi þessi kvöldstund verið tugþúsunda orða virði. Það er ljóst að með vinnu sinni hefur Sigurður safnað mikilvægum heimildum um sögulega atburði og hann miðlaði þeim afskaplega skemmtilega í kvöld.
Frekari upplýsingar um Sigurð og myndirnar hans má finna á vefsíðu hans, https://sosmyndir.is/, auk þess sem hann er á instagram, https://www.instagram.com/sosmyndir/.
Fókus þakkar Sigurði fyrir frábæra kvöldstund. Ef þig langar að komast í skemmtilegan félagsskap áhugafólks um ljósmyndun og komast á áhugaverða fyrirlestar eins og þennan, er hægt að skrá sig til leiks hér á vefnum.